എയർ ഇന്ത്യ വിമാനത്തിലെ ഭക്ഷണത്തിൽ നിന്നും കല്ല് ലഭിച്ചു; വിവാദമായതോടെ പ്രതികരണവുമായി അധികൃതർ രംഗത്ത്
എയർ ഇന്ത്യ വിമാനത്തിൽ യാത്ര ചെയ്തിരുന്ന യാത്രക്കാരിയ്ക്ക് ഫ്ലൈറ്റിൽ നിന്നും നൽകിയ ഭക്ഷണത്തില്‍ കല്ല് കണ്ടെത്തിയതായി റിപ്പോർട്ട്. പരാതിയുമായി രംഗത്ത് വന്നത് സർവ്വ പ്രിയ സർഗ്ഗാൻ എന്ന യുവതിയാണ്. ഇതിന്റെ ചിത്രങ്ങൾ ഇവർ സമൂഹ മാധ്യമത്തിലൂടെ പങ്കു വച്ചതോടെയാണ് സംഭവം പുറം ലോകം അറിയുന്നത്. ചിത്രം സോഷ്യൽ മീഡിയയിൽ വൈറലായി മാറിയിരിക്കുകയാണ്. നിരവധി പേരാണ് ഈ ചിത്രം ഷെയര്‍ ചെയതത്.
യാത്രിക സമൂഹ മാധ്യമത്തില്‍ പങ്ക് വച്ച ചിത്രത്തില്‍ കല്ല് വളരെ വ്യക്തമായി കാണാം. ചിത്രങ്ങള്‍ വ്യാപകമായി പ്രചരിച്ചതോടെ നിരവധി പേരാണ് സമൂഹ
മാധ്യമത്തിലൂടെ എയര്‍ ഇന്ത്യയെ വിമർശിച്ച് രംഗത്ത് വന്നത്. സർവ്വ പ്രിയ എയര്‍ ഇന്ത്യയെ ടാഗ് ചെയ്താണ് ചിത്രം സമൂഹ മാധ്യമത്തിലൂടെ പോസ്റ്റ് ചെയ്തത്. സംഭവം സോഷ്യല്‍ മീഡിയയില്‍ വൈറലായി മാറിയതോടെ വിഷയത്തിൽ പ്രതികരണം അറിയിച്ചു എയര്‍ ഇന്ത്യ തന്നെ രംഗത്ത് വന്നു. സംഭവം തങ്ങളുടെ ശ്രദ്ധയിൽ പെട്ടിട്ടുണ്ടെന്നും ഇതുമായി ബന്ധപ്പെട്ട അന്വേഷണം നടന്നു വരികയാണെന്നും അധികൃതർ ട്വീറ്റ് ചെയ്തു.
അടുത്തിടെയാണ് എയർ ഇന്ത്യ വിമാനത്തിലെ യാത്രക്കാരന് ഭക്ഷണത്തിൽ നിന്നും ചത്ത പാറ്റയെ കിട്ടിയ സംഭവം സമൂഹ മാധ്യമത്തിലൂടെ പുറത്തു വന്നത്. അന്ന് വിമാനക്കമ്പനി പരസ്യമായി മാപ്പ് പറയുന്ന സ്ഥിതി വരെ ഉണ്ടായി. വിസ്താര ഫ്ലൈറ്റിൽ വിളമ്പിയ ഭക്ഷണത്തിൽ നിന്നാണ് നിഗുൽ സോളങ്കി എന്ന യാത്രക്കാരന് പാറ്റയെ ലഭിച്ചത്. ഇതിന്റെ ചിത്രങ്ങൾ ഉൾപ്പെടെ സമൂഹ മാധ്യമത്തിൽ പ്രചരിച്ചത് എയർ ഇന്ത്യയ്ക്ക് വരുത്തി വച്ച നാണക്കേട് ചില്ലറയല്ല.
